ഇരിങ്ങാലക്കുട: ലോകകപ്പ് ഫുട്ബോളിന്റെ ആവേശം കുട്ടികളിലേക്കും യുവജനങ്ങളിലേക്കും പകര്ന്നുകൊണ്ട് ഇരിങ്ങാലക്കുട സെന്റ് തോമസ് കത്തീഡ്രല് കെ.സി.വൈ.എം. സംഘടിപ്പിച്ച ഫുട്ബോള് ഷൂട്ടൗട്ട് മത്സരം ശ്രദ്ധേയമായി. കായികമനോഭാവം വളർത്തുന്നതിനും ഫുട്ബോളിനോടുള്ള കുട്ടികളുടെ താല്പര്യം പ്രോത്സാഹിപ്പിക്കുന്നതിനുമായാണ് പരിപാടി സംഘടിപ്പിച്ചത്.
സെന്റ് തോമസ് കത്തീഡ്രല് വികാരി വെ. റവ. ഡോ. ലാസര് കുറ്റിക്കാടന് മത്സരം ഉദ്ഘാടനം ചെയ്തു. അസിസ്റ്റന്റ് വികാരിമാരായ ഫാ. ലിന്റോ കാരേക്കാടന്, ഫാ. ക്രിസ്റ്റോണ് കൈനാടത്തുപറമ്പില്, ഫാ. ജസ്റ്റിന് കളര്പ്പാറ, ആനിമേറ്റര് ജോസ് മാമ്പിള്ളി എന്നിവര് ആശംസകള് നേര്ന്നു.
എഴുപതിലേറെ കുട്ടികൾ പങ്കെടുത്ത മത്സരത്തിൽ ആവേശകരമായ പ്രകടനങ്ങളാണ് അരങ്ങേറിയത്. ഗോള് നേടിയ എല്ലാ കുട്ടികള്ക്കും മെഡലുകള് നല്കി ആദരിച്ചു. കെ.സി.വൈ.എം. പ്രസിഡന്റ് പി.ഡി. ഡിജോ സ്വാഗതവും പ്രോഗ്രാം കണ്വീനര് ജോസ്ലിന് ജോസ് നന്ദിയും പറഞ്ഞു.
