ചാലക്കുടി: മൊബൈൽ ഫോണുകളുടെയും ഡിജിറ്റൽ വിനോദങ്ങളുടെയും ലോകത്ത് കുട്ടികളുടെ ബൗദ്ധികവും മാനസികവും സാമൂഹികവുമായ വളർച്ചയ്ക്ക് ചെസ് പോലുള്ള ബുദ്ധിപരമായ കളികൾക്ക് വലിയ പ്രാധാന്യമുണ്ടെന്ന് ഓർമിപ്പിച്ച് ചാലക്കുടിയിൽ സംഘടിപ്പിച്ച റോട്ടറി മാസ്റ്റേഴ്സ് കപ്പ് 2026 ശ്രദ്ധേയമായി. ലഹരിയിൽനിന്ന് കുട്ടികളെയും യുവാക്കളെയും അകറ്റി ചിന്താശേഷിയും ഏകാഗ്രതയും അച്ചടക്കവും വളർത്തുകയെന്ന ലക്ഷ്യത്തോടെ ചാലക്കുടി നഗരസഭയും റോട്ടറി ക്ലബ് ഓഫ് ചാലക്കുടി ടൗണും സംയുക്തമായാണ് അഖില കേരള ചെസ് ടൂർണമെന്റ് സംഘടിപ്പിച്ചത്. കേരളത്തിലെ വിവിധ ജില്ലകളിൽനിന്നായി 500-ഓളം മത്സരാർഥികൾ പങ്കെടുത്തു. ഫ്യൂച്ചർ ചെസ് അക്കാദമിയാണ് ടൂർണമെന്റിന് സാങ്കേതിക പിന്തുണ നൽകിയത്.
മൊബൈൽ ഫോണുകളിലും സാമൂഹികമാധ്യമങ്ങളിലും കൂടുതൽ സമയം ചെലവഴിക്കുന്ന കുട്ടികൾക്ക് ചിന്തിക്കാനും തീരുമാനങ്ങളെടുക്കാനും ക്ഷമയോടെ ലക്ഷ്യത്തിലെത്താനും അവസരമൊരുക്കുന്ന മികച്ച വിനോദമാണ് ചെസ്. ഓരോ നീക്കവും ആലോചിച്ചുറപ്പിക്കേണ്ട ഈ കളി കുട്ടികളിൽ ഏകാഗ്രത, ഓർമശക്തി, യുക്തിചിന്ത, പ്രശ്നപരിഹാരശേഷി, ആസൂത്രണ മികവ് എന്നിവ വളർത്താൻ സഹായിക്കുന്നു. ജയപരാജയങ്ങളെ സമചിത്തതയോടെ സ്വീകരിക്കാനും എതിരാളികളെ ബഹുമാനിക്കാനും പഠിപ്പിക്കുന്ന ചെസ്, പഠനത്തിനൊപ്പം കുട്ടികളുടെ സമഗ്രവളർച്ചയ്ക്കും സഹായകമാണ്. ഈ സന്ദേശം ഉയർത്തിപ്പിടിച്ചാണ് “Say No to Drugs, Yes to Chess” എന്ന ആപ്തവാക്യത്തോടെ ടൂർണമെന്റ് സംഘടിപ്പിച്ചത്.
ചാലക്കുടി എംഎൽഎ സനീഷ് കുമാർ ജോസഫ് ടൂർണമെന്റ് ഉദ്ഘാടനം ചെയ്തു. ചാലക്കുടി നഗരസഭാ ചെയർപേഴ്സൺ ആലിസ് ഷിബു അധ്യക്ഷത വഹിച്ചു. നഗരസഭാ വൈസ് ചെയർപേഴ്സൻ കെ.വി. പോൾ, ചെസ് അസോസിയേഷൻ തൃശ്ശൂർ പ്രസിഡന്റ് വിപിൻ വിജയൻ, റോട്ടറി ക്ലബ് ചാർട്ടേഡ് പ്രസിഡന്റ് പി.ഡി. ദിനേശ് എന്നിവർ ആശംസകൾ നേർന്നു. റോട്ടറി ക്ലബ് പ്രസിഡന്റ് സലിം മണപ്പറമ്പിൽ സ്വാഗതവും
ക്ലബ് സെക്രട്ടറി ഷാജു സി.വി. നന്ദിയും പറഞ്ഞു.
മത്സരത്തിൽ മുഹമ്മദ് ഫസൽ ചാമ്പ്യനായി. അണ്ടർ 15 വിഭാഗത്തിൽ ശ്രീഹരി ലാലുവും അണ്ടർ 10 വിഭാഗത്തിൽ ഗോവിന്ദും ഒന്നാം സ്ഥാനം നേടി. മികച്ച ചെസ് സ്കൂളായി മാളയിലെ ഡോ. രാജു ഡേവിസ് ഇന്റർനാഷണൽ സ്കൂളിനെയും മികച്ച ചെസ് അക്കാദമിയായി ഫ്യൂച്ചർ ചെസ് അക്കാദമിയെയും തിരഞ്ഞെടുത്തു.
സമാപനച്ചടങ്ങിൽ എക്സൈസ് ഇൻസ്പെക്ടർ രാജു ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. നഗരസഭാ വൈസ് ചെയർപേഴ്സൻ കെ.വി. പോൾ സമ്മാനദാനം നിർവഹിച്ചു. അഡ്വ. കുഞ്ഞുമോൻ കന്യാടത്ത് ആശംസകൾ നേർന്നു. ക്ലബ് ട്രഷറർ സുനിലൻ കെ.വി. നന്ദി പറഞ്ഞു.
കുട്ടികളുടെ ഒഴിവുസമയങ്ങൾ സർഗാത്മകവും വിജ്ഞാനപ്രദവുമാക്കാനും ലഹരിയുടെ അപകടങ്ങളിൽനിന്ന് അവരെ സംരക്ഷിക്കാനും കായിക-ബൗദ്ധിക വിനോദങ്ങൾക്ക് കൂടുതൽ അവസരങ്ങൾ ഒരുക്കേണ്ടതിന്റെ ആവശ്യകതയാണ് റോട്ടറി മാസ്റ്റേഴ്സ് കപ്പ് 2026 മുന്നോട്ടുവയ്ക്കുന്നത്. മത്സരവേദികൾക്കപ്പുറം ചെസിനെ കുട്ടികളുടെ ജീവിതത്തിന്റെ ഭാഗമാക്കാൻ ഇത്തരം സംരംഭങ്ങൾ സഹായകമാകുമെന്ന പ്രതീക്ഷയും ഇതിലൂടെ ഉയരുന്നു.
ന്യൂസ്ഡെസ്‌ക് കേരളടൈംസ്
