ചാലക്കുടി: ചാലക്കുടിയുടെ സാമൂഹ്യ, സാംസ്കാരിക, രാഷ്ട്രീയ മേഖലകളിൽ സജീവ സാന്നിധ്യമായിരുന്ന മുൻ കസ്റ്റംസ് ആൻഡ് സെൻട്രൽ എക്സൈസ് സൂപ്രണ്ട് പി. അശോകന്റെ സ്മരണാർഥം ഏർപ്പെടുത്തിയ പി. അശോകൻ മെമ്മോറിയൽ മെറിറ്റോറിയസ് അവാർഡ് ഈ വർഷം പ്രമുഖ ത്വക് രോഗ ചികിത്സാവിദഗ്ധൻ ഡോ. ജോർജ് ചാക്കോളക്ക് നൽകും.
നിശ്ചയദാർഢ്യത്തോടെ ഔദ്യോഗിക ചുമതലകൾ നിർവഹിച്ചിരുന്ന പി. അശോകൻ, നേതൃത്വപാടവത്തോടെ കാര്യങ്ങൾ ആസൂത്രണം ചെയ്ത് നടപ്പാക്കുന്നതിലും മികച്ച സംഘാടന മികവ് പുലർത്തിയിരുന്ന വ്യക്തിയായിരുന്നു. ഔദ്യോഗിക ജീവിതത്തോടൊപ്പം ചാലക്കുടിയുടെ സാമൂഹ്യ, സാംസ്കാരിക, രാഷ്ട്രീയ മേഖലകളിലും സജീവമായി ഇടപെട്ട അദ്ദേഹം പൊതുസമൂഹവുമായി അടുത്ത ബന്ധം പുലർത്തിയിരുന്നു. പ്രശസ്ത സിനിമ സംവിധായകൻ സുന്ദർദാസിന്റെയും ചാലക്കുടിയിലെ പൊതുരംഗത്ത് സജീവ സാന്നിധ്യമായ സുബാഷ് ചന്ദ്ര ദാസിന്റെയും പിതാവാണ് പി. അശോകൻ.
ചാലക്കുടിയിലെ ജനകീയനായ ഡോക്ടർ എന്ന നിലയിൽ ശ്രദ്ധേയനായ ഡോ. ജോർജ് ചാക്കോളയുടെ ചികിത്സാരംഗത്തെ സേവനങ്ങളും പൊതുസമൂഹത്തോടുള്ള ഇടപെടലുകളും പരിഗണിച്ചാണ് ഈ വർഷത്തെ പുരസ്കാരത്തിന് തെരഞ്ഞെടുത്തത്. ത്വക്ക് രോഗ ചികിത്സാരംഗത്ത് ദീർഘകാലമായി സേവനം നടത്തുന്ന ഡോ. ചാക്കോളയ്ക്ക് ചാലക്കുടിയിലും പരിസര പ്രദേശങ്ങളിലും വലിയൊരു രോഗി സമൂഹവുമായി അടുത്ത ബന്ധമുണ്ട്.
പി. അശോകന്റെ ഓർമ്മദിനമായ ഒക്ടോബർ 11ന് വൈകീട്ട് 4ന് ചാലക്കുടി വ്യാപാരഭവനിൽ നടക്കുന്ന അനുസ്മരണയോഗത്തിൽ പുരസ്കാരം സമ്മാനിക്കും. സാമൂഹ്യ, സാംസ്കാരിക, രാഷ്ട്രീയ രംഗങ്ങളിലെ പ്രമുഖർ ചടങ്ങിൽ പങ്കെടുക്കും.
പി. അശോകന്റെ സ്മരണ നിലനിർത്തുന്നതിനൊപ്പം വിവിധ മേഖലകളിൽ ശ്രദ്ധേയമായ സംഭാവനകൾ നൽകുന്ന വ്യക്തികളെ ആദരിക്കുക എന്ന ലക്ഷ്യത്തോടെയാണ് മെമ്മോറിയൽ മെറിറ്റോറിയസ് അവാർഡ് ഏർപ്പെടുത്തിയിരിക്കുന്നത്.
അനുസ്മരണ സമിതി ചെയർമാൻ പ്രൊഫ. എ.എം. മാത്യു, ജനറൽ കൺവീനർ എൻ. കുമാരൻ, ചീഫ് കോ-ഓർഡിനേറ്റർ അഡ്വ. ആന്റോ ചെറിയാൻ എന്നിവർ പത്രക്കുറിപ്പിലൂടെയാണ് ഇക്കാര്യം അറിയിച്ചത്.
ന്യൂസ് ഡെസ്ക് കേരളടൈംസ്.
