തൃശൂർ: പ്രശസ്ത തീർത്ഥാടന കേന്ദ്രമായ തൃശൂർ വടക്കുംനാഥ ക്ഷേത്രത്തിലെ മുൻ മേൽശാന്തിയും, ചെമ്പൂക്കാവ് ഭഗവതി ക്ഷേത്രത്തിലെ മേൽശാന്തിയുമായിരുന്ന പുറനാട്ടുകര കൊറ്റമ്പിള്ളിമന നാരായണൻ നമ്പൂതിരി (60) ഭഗവൽസന്നിധിയിൽ വെച്ച് ഈശ്വരസായൂജ്യമടഞ്ഞു. ശനിയാഴ്ച രാവിലെ എട്ടുമണിയോടെ ചെമ്പൂക്കാവ് ക്ഷേത്രത്തിലെ നിത്യനിദാന കർമ്മങ്ങൾക്കിടയിൽ അദ്ദേഹം പെട്ടെന്ന് കുഴഞ്ഞുവീഴുകയായിരുന്നു. ഉടൻ തന്നെ ആശുപത്രിയിൽ എത്തിച്ചുവെങ്കിലും ആത്മാവ് പ്രകൃതിയിൽ ലയിച്ചിരുന്നു.
ദശാബ്ദങ്ങളായി ക്ഷേത്രോപാസനയും മന്ത്രസാധനയും ജീവിതചര്യയാക്കിയ അദ്ദേഹം, ഭക്തലക്ഷങ്ങൾക്ക് ഭഗവദ്പ്രസാദം പകർന്നുനൽകിയ പുണ്യാത്മാവായിരുന്നു. തന്റെ ആത്മീയ കർമ്മഭൂമിയായ ഭഗവൽസന്നിധിയിൽ വെച്ചുതന്നെ മർത്ത്യശരീരം വെടിഞ്ഞു എന്നത് അദ്ദേഹത്തിന്റെ ഭക്തിസാധനയുടെ പൂർണ്ണതയായി ഭക്തജനങ്ങൾ ദർശിക്കുന്നു.
സംസ്കാരം: ഞായറാഴ്ച പകൽ ഒമ്പതിന് പുറനാട്ടുകരയിലുള്ള സ്വവസതിയിൽ നടക്കും.
കുടുംബം: ഭാര്യ സിന്ധു. മക്കൾ: അപർണ നാരായണൻ, ശബരിനാഥ്.
