മുണ്ടൂർ: മൗണ്ട് കർമ്മൽ ദൈവാലയത്തിലെ സി.എൽ.സി.യുടെ ആഭിമുഖ്യത്തിൽ സംഘടിപ്പിച്ച “ഓര്ത്തൂസ് സാങ്ക്ത്തോരും” – വിശുദ്ധരുടെ പൂന്തോട്ടം’ എന്ന ആത്മീയ പ്രദർശനം ഭക്തിനിർഭരമായ അന്തരീക്ഷത്തിൽ ശ്രദ്ധേയമാകുന്നു. ജൂലൈ 18, 19 തീയതികളിലായി നടക്കുന്ന പ്രദർശനം ഇടവക വികാരി ഫാ. ബാബു അപ്പാടൻ ഉദ്ഘാടനം ചെയ്തു.
ലോകത്തിന്റെ വിവിധ ഭാഗങ്ങളിൽ വിശുദ്ധജീവിതം നയിച്ച 1500 വിശുദ്ധരുടെ തിരുശേഷിപ്പുകൾ ഒരേ വേദിയിൽ പ്രദർശിപ്പിക്കുന്നത് അത്യപൂർവവും അനുഗ്രഹപ്രദവുമായ ആത്മീയ അനുഭവമാണെന്ന് അസിസ്റ്റന്റ് വികാരി ഫാ. ഡറിൻ അരിമ്പൂർ പറഞ്ഞു. വിശുദ്ധരുടെ മാദ്ധ്യസ്ഥം തേടി പ്രാർത്ഥിക്കാനും അവരുടെ വിശുദ്ധജീവിതം അടുത്തറിയാനും വിശ്വാസികൾക്ക് ഈ പ്രദർശനം അപൂർവ അവസരമാണ് ഒരുക്കുന്നതെന്നും അദ്ദേഹം പറഞ്ഞു.
‘വിശുദ്ധരുടെ പൂന്തോട്ടം’ എന്ന ആശയത്തിൽ ഒരുക്കിയിരിക്കുന്ന പ്രദർശനത്തിൽ തിരുശേഷിപ്പുകൾ ദർശിച്ച് വണങ്ങുന്നതിനൊപ്പം വിശുദ്ധരുടെ ജീവിതമാതൃകകളെ പരിചയപ്പെടാനും വിശുദ്ധിയിലേക്കുള്ള ജീവിതവിളി പുതുക്കാനും സന്ദർശകർക്ക് അവസരമുണ്ട്. ഭൂമിയിൽ ദൈവത്തെ മഹത്വപ്പെടുത്തി വിശുദ്ധിയിൽ ജീവിച്ചവരുടെ സാക്ഷ്യം വിശ്വാസജീവിതത്തിന് പ്രചോദനമാകുന്ന ആത്മീയ വേദിയായാണ് പ്രദർശനം ഒരുക്കിയിരിക്കുന്നത്.
ഭക്തിയോടൊപ്പം കുടുംബങ്ങൾക്കും യുവജനങ്ങൾക്കും കുട്ടികൾക്കും ഒരുപോലെ ആസ്വദിക്കാവുന്ന നിരവധി പരിപാടികളും ഉൾപ്പെടുത്തിയിട്ടുണ്ട്. വിശുദ്ധരുടെ ചിത്രങ്ങൾക്കൊപ്പമുള്ള സ്മരണാചിത്രങ്ങൾ (സെൽഫി) പകർത്തുന്നതിനുള്ള പ്രത്യേക സൗകര്യം, ആത്മീയ വായനാമുറി, ഈശോയുടെയും ശിഷ്യരുടെയും ജീവിതം അവതരിപ്പിക്കുന്ന ‘ദി ചോസൻ’ പരമ്പരയുടെ പ്രദർശനം എന്നിവയും ഒരുക്കിയിട്ടുണ്ട്.
‘സ്റ്റാൻഡപ്പ് വിശുദ്ധർ’ എന്ന പേരിൽ വ്യത്യസ്തമായ മത്സരവും പ്രദർശനത്തിന്റെ പ്രത്യേക ആകർഷണമാണ്. രണ്ടര മിനിറ്റിൽ കുറയാതെ ഒരു വിശുദ്ധന്റെ ജീവിതവും സന്ദേശവും അവതരിപ്പിക്കുന്ന മത്സരത്തിൽ വിശുദ്ധരുടെ വേഷത്തിൽ പങ്കെടുക്കുന്നവർക്ക് പ്രത്യേക പരിഗണന നൽകും. കുട്ടികൾക്കായി രാവിലെയും മുതിർന്നവർക്കായി ഉച്ചയ്ക്ക് 3 മുതൽ 5 വരെയും മത്സരങ്ങൾ നടക്കും. അവതരണ മികവിന്റെ അടിസ്ഥാനത്തിൽ സമ്മാനങ്ങളും നൽകും.
ഇതുവരെ അധികമാരും പരിചയമില്ലാത്ത വിശുദ്ധരുടെ തിരുശേഷിപ്പുകൾ ദർശിക്കാനും ലോകത്തിന്റെ വിവിധ ഭാഗങ്ങളിൽ നിന്നുള്ള വിശുദ്ധരുടെ വിശ്വാസസാക്ഷ്യം അടുത്തറിയാനും അവസരമൊരുക്കുന്ന ഈ ആത്മീയ പ്രദർശനം വിശ്വാസികൾക്ക് അപൂർവ അനുഗ്രഹ മുഹൂർത്തമായിരിക്കുകയാണ്.
ജനറൽ കൺവീനർ ബസനിയോ ജോസഫ്, കൺവീനർ സി.എ. ജോൺസൺ, പ്രോഗ്രാം കൺവീനർ എൽ. റോയ് എന്നിവരുടെ നേതൃത്വത്തിൽ ബെനറ്റ്, സിൻസി ജോസഫ്, ഡെയ്സി വർഗീസ്, സിജോ പി. ഓ., അലൻ ആന്റോ, അൽവിറ്റ് എന്നിവരുള്പ്പെടെയുള്ള പ്രവർത്തകരാണ് പരിപാടികൾക്ക് നേതൃത്വം നൽകുന്നത്.
