പീച്ചി: വൈകിയെത്തിയ മൺസൂൺ മഴയിൽ നിറഞ്ഞുതുളുമ്പി പീച്ചി ഡാം. വൃഷ്ടിപ്രദേശങ്ങളിൽ കനത്ത മഴ തുടർന്നതോടെ ഡാമിലേക്കുള്ള നീരൊഴുക്ക് ശക്തമാകുകയും ജലനിരപ്പ് ഉയർന്ന നിലയിലെത്തുകയും ചെയ്തു. വരണ്ടുണങ്ങിയ ജലാശയത്തിന് പുതുജീവൻ കൈവന്നത് തൃശൂർ ജില്ലയിലെ കർഷകർക്കും പ്രദേശവാസികൾക്കും വലിയ ആശ്വാസമാണ് പകരുന്നത്.
ഹരിതാഭമായ കുന്നുകൾക്ക് നടുവിൽ കൗമാര സുന്ദരിയെപ്പോലെ തെളിനീരുമായി ശോഭിക്കുന്ന പീച്ചിയുടെ ദൃശ്യഭംഗി ആസ്വദിക്കാൻ നിരവധി വിനോദസഞ്ചാരികളാണ് എത്തുന്നത്. ജലനിരപ്പ് ഉയർന്നതോടെ മേഖലയിലെ ബോട്ടിങ് ഉൾപ്പെടെയുള്ള ടൂറിസം പ്രവർത്തനങ്ങൾക്ക് കൂടുതൽ ഉണർവ് കൈവന്നു. എന്നാൽ, സുരക്ഷ മുൻനിർത്തി സന്ദർശകർ ഡാമിന്റെ തീരങ്ങളിൽ അപകടകരമായ രീതിയിൽ ഇറങ്ങുന്നതിനും നീന്തുന്നതിനും അധികൃതർ കർശന നിയന്ത്രണം ഏർപ്പെടുത്തിയിട്ടുണ്ട്. ഡാം പരിസരത്തും താഴ്ന്ന പ്രദേശങ്ങളിൽ താമസിക്കുന്നവരും ജാഗ്രത പാലിക്കണമെന്ന് മുന്നറിയിപ്പുണ്ട്.
പീച്ചി ചെറുകിട ജലവൈദ്യുത നിലയത്തിൽ ട്രയൽ റൺ നടത്തി
ഡാമിലെ ജലനിരപ്പ് ഉയർന്ന സാഹചര്യത്തിൽ പീച്ചി ചെറുകിട ജലവൈദ്യുത നിലയത്തിൽ അറ്റകുറ്റപ്പണികളുടെ ഭാഗമായുള്ള ട്രയൽ റൺ വിജയകരമായി പൂർത്തിയാക്കി. കെ.എസ്.ഇ.ബി ചെറുകിട ജലവൈദ്യുത നിലയം അസിസ്റ്റന്റ് എഞ്ചിനീയറുടെ നേതൃത്വത്തിലാണ് പരിശോധന നടന്നത്. ബുധനാഴ്ച ഉച്ചയ്ക്ക് രണ്ടിനും മൂന്നിനും ഇടയിലുള്ള സമയത്ത് 15 മിനിറ്റോളം പവർഹൗസിൽ നിന്ന് പുഴയിലേക്ക് വെള്ളം ഒഴുക്കിവിട്ടു. ആവശ്യമായ എല്ലാ സുരക്ഷാ മുൻകരുതലുകളും സ്വീകരിച്ച ശേഷമായിരുന്നു ട്രയൽ റൺ നടത്തിയത്.
