മണ്ണുത്തി : കാർഷിക സർവകലാശാലാ ക്യാമ്പസിലെ കുളത്തിൽ വീണ് ഗവേഷക വിദ്യാർത്ഥി മുങ്ങിമരിച്ചു. കർണാടക ചിന്തനഹള്ളി സ്വദേശിയായ കിഷോർ കുമാർ ഗൗഡ (25) ആണ് ദാരുണമായി കൊല്ലപ്പെട്ടത്. കേരള കാർഷിക സർവകലാശാലയിലെ പി.എച്ച്.ഡി (PhD) വിദ്യാർത്ഥിയായിരുന്നു ഇദ്ദേഹം.ഇന്ന് പുലർച്ചെ ഒരു മണിയോടെയാണ് സംഭവം നടന്നത്. സർവകലാശാലയിലെ ഹോസ്റ്റലിൽ താമസിച്ച് പഠിക്കുകയായിരുന്ന കിഷോർ കുമാർ, സുഹൃത്തിനൊപ്പം ക്യാമ്പസിലെ പൈനാപ്പിൾ തോട്ടത്തിന് സമീപമുള്ള ഭാഗത്തേക്ക് ഡ്രാഗൺ ഫ്രൂട്ട് പറിക്കാനായി പോയതായിരുന്നു. ഇതിനിടയിൽ സമീപത്തെ കുളത്തിലേക്ക് അബദ്ധത്തിൽ കാൽവഴുതി വീഴുകയായിരുന്നു എന്ന് കരുതപ്പെടുന്നു.ഉടൻ തന്നെ വിവരമറിഞ്ഞെത്തിയ ഫയർഫോഴ്സ് സംഘം തെരച്ചിൽ നടത്തി മൃതദേഹം കുളത്തിൽ നിന്ന് പുറത്തെടുത്തു. തുടർ നടപടികൾക്കായി മൃതദേഹം തൃശ്ശൂർ ജനറൽ ആശുപത്രി മോർച്ചറിയിലേക്ക് മാറ്റിയിട്ടുണ്ട്. പോലീസ് സംഭവത്തിൽ കേസ് രജിസ്റ്റർ ചെയ്ത് അന്വേഷണം ആരംഭിച്ചു.
തൃശ്ശൂർ കാർഷിക സർവകലാശാലാ ക്യാമ്പസിലെ കുളത്തിൽ വീണ് പി.എച്ച്.ഡി വിദ്യാർത്ഥി മുങ്ങിമരിച്ചു
