ന്യൂഡൽഹി / ചാലക്കുടി: മണ്ഡലത്തിലെ ദീർഘകാല റെയിൽവേ വികസന ആവശ്യങ്ങളും ജനങ്ങളുടെ യാത്രാദുരിതവും ഉന്നയിച്ച് കേന്ദ്ര റെയിൽവേ മന്ത്രി അശ്വിനി വൈഷ്ണവിന് ബെന്നി ബെഹന്നാൻ എം.പി. നേരിട്ടെത്തി നിവേദനം സമർപ്പിച്ചു.
കൊച്ചി അന്താരാഷ്ട്ര വിമാനത്താവളത്തിന് സമീപം നിർമ്മാണം ആരംഭിക്കുന്ന നെടുമ്പാശ്ശേരി റെയിൽവേ സ്റ്റേഷന്റെ പണികൾ അതിവേഗം പൂർത്തിയാക്കി എത്രയും വേഗം പ്രവർത്തനക്ഷമമാക്കണമെന്ന് എം.പി. ആവശ്യപ്പെട്ടു. വിമാനത്താവള യാത്രക്കാർക്ക് ഉപകാരപ്പെടുംവിധം വന്ദേ ഭാരത് ഉൾപ്പെടെയുള്ള പ്രമുഖ ട്രെയിനുകൾക്ക് നെടുമ്പാശ്ശേരിയിൽ സ്റ്റോപ്പ് അനുവദിക്കണമെന്നും മന്ത്രിയോട് അഭ്യർത്ഥിച്ചു.
ആലുവ റെയിൽവേ സ്റ്റേഷന്റെ പടിഞ്ഞാറൻ പ്രവേശന കവാടം, വിശാലമായ പാർക്കിംഗ് സൗകര്യം, എസ്കലേറ്റർ, ലിഫ്റ്റ് എന്നിവയുടെ നിർമ്മാണം ‘അമൃത് ഭാരത്’ പദ്ധതിയിൽ ഉൾപ്പെടുത്തി അടിയന്തരമായി പൂർത്തിയാക്കണം.
വഴിയാത്രക്കാരുടെയും സ്ഥിരം യാത്രക്കാരുടെയും യാത്രാദുരിതം പരിഹരിക്കാൻ പ്രധാന സ്റ്റേഷനുകളിൽ കൂടുതൽ ട്രെയിനുകൾക്ക് സ്റ്റോപ്പ് വേണമെന്നും എം.പി. ചൂണ്ടിക്കാട്ടി:
അങ്കമാലിയിൽ: ധൻബാദ് എക്സ്പ്രസ്, ഏറനാട് എക്സ്പ്രസ്
ചാലക്കുടിയിൽ: പാലരുവി എക്സ്പ്രസ്, നേത്രാവതി എക്സ്പ്രസ്
ചാലക്കുടി മണ്ഡലത്തിന്റെ സമഗ്ര വികസനത്തിനും ജനങ്ങളുടെ യാത്രാസൗകര്യം വർദ്ധിപ്പിക്കുന്നതിനുമുള്ള ഇടപെടലുകൾ നിരന്തരം തുടരുമെന്ന് നിവേദനത്തിന് ശേഷം എം.പി. സോഷ്യൽ മീഡിയയിലൂടെ വ്യക്തമാക്കി.
ചാലക്കുടിയുടെ റെയിൽവേ വികസനം: കേന്ദ്ര റെയിൽവേ മന്ത്രി അശ്വിനി വൈഷ്ണവിന് ബെന്നി ബെഹന്നാൻ എം.പി. നിവേദനം നൽകി
