കോട്ടയം: പൂരപ്പറമ്പുകളിലെ തലയെടുപ്പും അഴകും കൊണ്ട് ആനപ്രേമികളുടെ ഹൃദയം കീഴടക്കിയ പ്രശസ്ത ഗജവീരൻ ‘പല്ലാട്ട് ബ്രഹ്മദത്തൻ’ ഇടിമിന്നലേറ്റ് ചരിഞ്ഞു. ഈരാറ്റുപേട്ടയിലെ വീട്ടുമുറ്റത്ത് തളച്ചിരുന്ന ബ്രഹ്മദത്തന് ശക്തമായ ഇടിമിന്നലേൽക്കുകയായിരുന്നു. മിന്നലിന്റെ ആഘാതത്തിൽ സംഭവസ്ഥലത്തുതന്നെ ആന ചരിഞ്ഞു.
ഏകദേശം പത്തടി ഉയരവും ആകർഷകമായ ലക്ഷണങ്ങളും ഒത്തുചേർന്ന ബ്രഹ്മദത്തനെ ബിഹാറിൽ നിന്നാണ് കേരളത്തിലെത്തിച്ചത്. കേരളത്തിലെത്തി ചുരുങ്ങിയ കാലത്തിനുള്ളിൽ തന്നെ പ്രമുഖ ക്ഷേത്രങ്ങളിലെ ഉത്സവ എഴുന്നള്ളിപ്പുകളിലും പൂരപ്പറമ്പുകളിലും ശ്രദ്ധേയ സാന്നിധ്യമായി മാറിയ ഗജവീരൻ ആനപ്രേമികളുടെയും ഉത്സവപ്രേമികളുടെയും പ്രിയങ്കരനായിരുന്നു.
തൃശൂർ പൂരത്തിലെ പാറമേക്കാവ് വിഭാഗത്തിന്റെ രാത്രി പൂരത്തിൽ തിടമ്പേറ്റുന്ന പ്രധാന ആനകളിലൊന്നായിരുന്നു ബ്രഹ്മദത്തൻ. തലയെടുപ്പും ഗാംഭീര്യവും നിറഞ്ഞ എഴുന്നള്ളിപ്പ് കാഴ്ചകളിലൂടെ പൂരപ്രേമികളുടെ മനസ്സിൽ സ്വന്തമായൊരു ഇടം നേടിയ ഈ ഗജവീരന്റെ അപ്രതീക്ഷിത വേർപാട് ഉത്സവലോകത്തിന് തീരാനഷ്ടമാണ്.
പൂരപ്പറമ്പുകളിൽ ഗാംഭീര്യത്തോടെ തലയുയർത്തി നിന്നിരുന്ന ബ്രഹ്മദത്തന്റെ രൂപം ഇനി ഓർമ്മകളിൽ മാത്രം. പൂരങ്ങളുടെ ആവേശത്തിനൊപ്പം ആനപ്രേമികളുടെ ഹൃദയങ്ങളിൽ ഇടം നേടിയ ‘രാജകുമാരൻ’ വിടവാങ്ങുമ്പോൾ, അവശേഷിക്കുന്നത് ഒരുപിടി മനോഹരമായ ഓർമ്മകളും നൊമ്പരവുമാണ്.
ബ്രഹ്മദത്തന്റെ അപ്രതീക്ഷിത വിയോഗത്തിൽ ആനപ്രേമികളും ക്ഷേത്രോത്സവ സംഘാടകരും നാട്ടുകാരും ദുഃഖം രേഖപ്പെടുത്തി.
ന്യൂസ്ഡെസ്‌ക് കേരളടൈംസ്.
