ചാലക്കുടി: കാശ്മീരിന്റെ മണ്ണിൽ നടന്ന 48-ാമത് ഇന്ത്യൻ ഫെഡറേഷൻ അഖിലേന്ത്യ പഞ്ചഗുസ്തി ചാമ്പ്യൻഷിപ്പിൽ ചാലക്കുടി പരിയാരം സ്വദേശി സോണി വർഗീസിന് തിളക്കമാർന്ന ഒന്നാം സ്ഥാനം. ഗ്രാൻഡ് മാസ്റ്റേഴ്സ് വിഭാഗത്തിൽ 50 മുതൽ 60 വയസ്സ് വരെയുള്ള പ്രായപരിധിയിൽ 70 മുതൽ 80 കിലോഗ്രാം വിഭാഗത്തിലാണ് സോണി വർഗീസ് കരുത്തിന്റെ മികവ് തെളിയിച്ച് ചാമ്പ്യനായത്.
ഒക്ടോബർ 2, 3, 4 തീയതികളിലായി കാശ്മീരിൽ നടന്ന ദേശീയതല മത്സരത്തിൽ രാജ്യത്തിന്റെ വിവിധ ഭാഗങ്ങളിൽ നിന്നായി ആയിരത്തോളം പഞ്ചഗുസ്തി താരങ്ങളാണ് മാറ്റുരച്ചത്. കേരളത്തിൽ നിന്ന് അറുപതോളം താരങ്ങൾ മത്സരത്തിൽ പങ്കെടുത്തു.
സബ്ജൂനിയർ, ജൂനിയർ, മാസ്റ്റേഴ്സ്, ഗ്രാൻഡ് മാസ്റ്റേഴ്സ്, സീനിയർ ഗ്രാൻഡ് മാസ്റ്റേഴ്സ് എന്നീ അഞ്ച് പ്രധാന വിഭാഗങ്ങളിലായി മത്സരം നടന്നു. ഓരോ വിഭാഗത്തിലും അഞ്ച് കാറ്റഗറികളിലായാണ് താരങ്ങൾ മത്സരിച്ചത്. ഇതിൽ ഗ്രാൻഡ് മാസ്റ്റേഴ്സ് വിഭാഗത്തിലെ 50–60 വയസ്സ് പ്രായപരിധിയിലും 70–80 കിലോഗ്രാം ഭാരവിഭാഗത്തിലുമായിരുന്നു സോണി വർഗീസിന്റെ മത്സരം.
പ്രായം കരുത്തിന് തടസ്സമല്ലെന്ന് തെളിയിച്ച പ്രകടനത്തിലൂടെയാണ് സോണി വർഗീസ് ദേശീയ വേദിയിൽ ചാലക്കുടിയുടെ അഭിമാനമായി മാറിയത്. ശക്തിയും ആത്മവിശ്വാസവും കഠിനപരിശീലനവും കൈമുതലാക്കി ദേശീയതലത്തിൽ ഒന്നാം സ്ഥാനം സ്വന്തമാക്കിയ സോണിയുടെ നേട്ടം ചാലക്കുടിയിലെ കായികപ്രേമികൾക്കും അഭിമാനമായി.
കാശ്മീരിൽ മുഴങ്ങിയ വിജയഘോഷം ചാലക്കുടിയിലെത്തുമ്പോൾ, സോണി വർഗീസിന്റെ നേട്ടം പുതിയ തലമുറയിലെ കായികതാരങ്ങൾക്കും പ്രചോദനമാകുകയാണ്.
ന്യൂസ്ഡെസ്‌ക് കേരളടൈംസ്
