അബുദാബി: ഗൾഫ് മണ്ണിൽ വീണ്ടുമൊരു മലയാളി പെരുമ. ഫുജൈറയിൽ നിന്ന് അബുദാബിയിലേക്ക് ഇത്തിഹാദ് പാസഞ്ചർ ട്രെയിൻ കുതിച്ചുപായുമ്പോൾ, അത് ലോകമെമ്പാടുമുള്ള മലയാളികൾക്ക് വലിയൊരു അഭിമാന നിമിഷമായി മാറുകയാണ്. യുഎഇയുടെ ഈ സ്വപ്ന പദ്ധതിയെ നയിക്കുന്ന മുൻനിരക്കാരിൽ ഒരാൾ ഒരു മലയാളിയാണ് എന്നതുതന്നെയാണ് ഈ നേട്ടത്തിന്റെ തിളക്കം കൂട്ടുന്നത്.
ഇത്തിഹാദ് റെയിൽ ശൃംഖലയിലെ ആദ്യത്തെ ഇന്ത്യൻ ട്രെയിൻ ക്യാപ്റ്റൻ എന്ന ചരിത്ര നേട്ടമാണ് ആലപ്പുഴ സ്വദേശിയായ നിഷാദ് (29) സ്വന്തമാക്കിയത്. കഠിനാധ്വാനത്തിലൂടെയും പ്രതിഭയിലൂടെയും യുഎഇയുടെ പൊതുഗതാഗത ചരിത്രത്തിന്റെ ഭാഗമാകാൻ ഈ ഇരുപത്തൊൻപതുകാരന് സാധിച്ചു. നിലവിൽ ഇത്തിഹാദ് റെയിലിന്റെ ‘ട്രെയിൻ ഡ്രൈവേഴ്സ് ലൈൻ മാനേജർ’ എന്ന ഉയർന്ന തസ്തികയിലാണ് നിഷാദ് സേവനമനുഷ്ഠിക്കുന്നത്.
ഗൾഫ് മേഖലയിലെ ഏറ്റവും വലിയ റെയിൽവേ ശൃംഖലകളിലൊന്നായ ഇത്തിഹാദ് റെയിലിൽ, ഇത്രയും ഉത്തരവാദിത്തമുള്ള പദവിയിലേക്ക് ഒരു മലയാളി യുവാവ് തെരഞ്ഞെടുക്കപ്പെട്ടത് പ്രവാസി സമൂഹത്തിന് ഒന്നടങ്കം ആവേശം പകരുന്ന വാർത്തയാണ്.
