ചാലക്കുടി: നാടകവേദിയിലും സിനിമയിലും തന്റേതായ വ്യക്തിമുദ്ര പതിപ്പിച്ച കലാകാരൻ ജോസ് പല്ലിശേരിയുടെ ഓർമകൾക്ക് വേദിയൊരുക്കി ചാലക്കുടിയിൽ വീണ്ടും നാടകവിരുന്ന്. ചാലക്കുടി റെസിഡന്റ്സ് അസോസിയേഷൻ കോർഡിനേഷൻ ട്രസ്റ്റ് (ക്രാക്റ്റ്), ചാലക്കുടി നഗരസഭയുടെ സഹകരണത്തോടെ സംഘടിപ്പിക്കുന്ന അഞ്ചാമത് ജോസ് പല്ലിശേരി അഖിലകേരള പ്രൊഫഷണൽ നാടകമേള നവംബർ 2 മുതൽ 8 വരെ നടക്കും.
ചാലക്കുടി ഫാസ് ഓഡിറ്റോറിയത്തിൽ വൈകിട്ട് 6.30 മുതലാണ് നാടകമേള അരങ്ങേറുന്നത്. കേരളത്തിലെ പ്രശസ്ത പ്രൊഫഷണൽ നാടക സമിതികളിൽനിന്ന് തെരഞ്ഞെടുത്ത ഏഴ് മികച്ച നാടകങ്ങളാണ് ഏഴ് ദിവസങ്ങളിലായി പ്രേക്ഷകർക്ക് മുന്നിലെത്തുക.
ജോസ് പല്ലിശേരി എന്ന കലാകാരന്റെ ഓർമ നിലനിർത്തുന്നതിനൊപ്പം ചാലക്കുടിയുടെ സമ്പന്നമായ നാടകപാരമ്പര്യത്തെ പുതുതലമുറയിലേക്ക് കൈമാറുക എന്ന ലക്ഷ്യവും നാടകമേളയ്ക്കുണ്ട്. നാടകത്തെയും സിനിമയെയും ഒരുപോലെ സ്നേഹിച്ചിരുന്ന ജോസ് പല്ലിശേരിയുടെ കലാജീവിതം ചാലക്കുടിയുടെ സാംസ്കാരിക ചരിത്രത്തിന്റെ ഭാഗമാണ്. അദ്ദേഹത്തിന്റെ ഓർമയിൽ സംഘടിപ്പിക്കുന്ന നാടകമേള കലാകാരനോടുള്ള ആദരവ് മാത്രമല്ല, ചാലക്കുടിയുടെ നാടകപെരുമയെ ആഘോഷിക്കുന്ന സാംസ്കാരിക സംഗമം കൂടിയാണ്.
നാടകവേദിയിലൂടെ സാമൂഹിക വിഷയങ്ങളും മനുഷ്യജീവിതത്തിന്റെ വിവിധ തലങ്ങളും പ്രേക്ഷകരിലേക്ക് എത്തിക്കുന്ന പ്രൊഫഷണൽ നാടകങ്ങൾക്ക് ഇന്നും വലിയ പ്രസക്തിയുണ്ട്. ദൃശ്യ-ശ്രാവ്യ മാധ്യമങ്ങളുടെ വളർച്ചയ്ക്കിടയിലും നേരിട്ട് പ്രേക്ഷകരുമായി സംവദിക്കുന്ന നാടകവേദിയുടെ ശക്തി നിലനിർത്തുക എന്നതും ഇത്തരം മേളകളുടെ പ്രധാന ലക്ഷ്യമാണ്.
സംഘാടകസമിതി രൂപീകരണ യോഗത്തിൽ ക്രാക്റ്റ് പ്രസിഡന്റ് പോൾ പാറയിൽ അധ്യക്ഷനായി. ചാലക്കുടി നഗരസഭ ചെയർപേഴ്സൺ ആലീസ് ഷിബു ഉദ്ഘാടനം ചെയ്തു. ജോസ് പല്ലിശേരി സ്മരണയിൽ സംഘടിപ്പിക്കുന്ന നാടകമേള ചാലക്കുടിയുടെ നാടകപെരുമ വിളിച്ചോതുന്നതോടൊപ്പം നഗരത്തിന് വലിയ സാംസ്കാരിക ഉണർവ് നൽകുമെന്നും ചെയർപേഴ്സൺ പറഞ്ഞു.
ചാലക്കുടി എം.പി. ബെന്നി ബഹനാൻ, എം.എൽ.എ. സനീഷ് കുമാർ ജോസഫ്, നഗരസഭ ചെയർപേഴ്സൺ ആലീസ് ഷിബു, ക്രാക്റ്റ് രക്ഷാധികാരി ജോർജ് ടി. മാത്യു എന്നിവർ രക്ഷാധികാരികളായും ക്രാക്റ്റ് പ്രസിഡന്റ് പോൾ പാറയിൽ ചെയർമാനായും നഗരസഭ വൈസ് ചെയർമാൻ കെ.വി. പോൾ, നഗരസഭ പ്രതിപക്ഷ നേതാവ് ജിൽ ആന്റണി എന്നിവർ വൈസ് ചെയർമാൻമാരായും ക്രാക്റ്റ് സെക്രട്ടറി പി.ഡി. ദിനേശ് ജനറൽ കൺവീനറായും ഡോ. കെ. സോമൻ, എൽസി ഡേവിസ് എന്നിവർ ജോയിന്റ് കൺവീനർമാരായും 75 അംഗ സംഘാടകസമിതി രൂപീകരിച്ചു.
ഏഴ് ദിവസങ്ങൾ, ഏഴ് മികച്ച നാടകങ്ങൾ, ഒരു മഹത്തായ കലാകാരന്റെ ഓർമ — ചാലക്കുടിയുടെ സാംസ്കാരിക കലണ്ടറിൽ മറ്റൊരു ശ്രദ്ധേയ അധ്യായത്തിനാണ് നാടകമേള വേദിയൊരുക്കുന്നത്.
ന്യൂസ് ഡെസ്ക് കേരളടൈംസ്.
