കൊച്ചി: കേരളത്തിൽ മൊബൈൽ ഫോൺ യുഗത്തിന് തുടക്കമിട്ട ചരിത്ര നിമിഷത്തിന് ഇന്ന് 30 വർഷം. 1996 സെപ്റ്റംബർ 17നാണ് കേരളത്തിലെ ആദ്യ മൊബൈൽ ഫോൺ സംഭാഷണം നടന്നത്. ജ്ഞാനപീഠ ജേതാവും സാഹിത്യകാരനുമായ തകഴി ശിവശങ്കരപ്പിള്ള അന്നത്തെ ദക്ഷിണമേഖലാ നാവികസേനാ മേധാവി വൈസ് അഡ്മിറൽ എ.ആർ. ടാൻഡനുമായി മൊബൈൽ ഫോണിലൂടെ സംസാരിച്ചാണ് ചരിത്രത്തിൽ ഇടം നേടിയ ആദ്യ കോൾ നടത്തിയത്.
എറണാകുളം ഹോട്ടൽ അവന്യൂ റീജന്റിൽ നടന്ന ചടങ്ങിലായിരുന്നു കേരളത്തിലെ ആദ്യ മൊബൈൽ സേവനത്തിന് തുടക്കമായത്. എസ്കോടെൽ മൊബൈൽ കമ്യൂണിക്കേഷൻസ് ആയിരുന്നു സംസ്ഥാനത്ത് മൊബൈൽ സേവനം ആരംഭിച്ചത്. ചടങ്ങ് പ്രശസ്ത എഴുത്തുകാരി മാധവിക്കുട്ടി (കമല സുരയ്യ) ഉദ്ഘാടനം ചെയ്തു. ഉദ്ഘാടനത്തിന്റെ ഭാഗമായി തകഴി മൊബൈൽ ഫോണിൽ നിന്ന് കൊച്ചിയിലെ നേവൽ ബേസിലുള്ള വൈസ് അഡ്മിറൽ എ.ആർ. ടാൻഡനെ വിളിക്കുകയായിരുന്നു. തുടർന്ന് മാധവിക്കുട്ടിയും ടാൻഡനുമായി മൊബൈൽ ഫോണിലൂടെ സംസാരിച്ചു.
അന്ന് മൊബൈൽ ഫോൺ സാധാരണക്കാരന്റെ കൈയിലെത്താത്ത ആഡംബരമായിരുന്നു. ഒരു ഔട്ട്ഗോയിംഗ് കോളിന് മിനിറ്റിന് 16.80 രൂപയും ഇൻകമിംഗ് കോളിന് 8.40 രൂപയും ഈടാക്കിയിരുന്ന കാലം. മൊബൈൽ ഹാൻഡ്സെറ്റുകളുടെ വില ഏകദേശം 20,000 രൂപ മുതൽ ആരംഭിച്ചിരുന്നു. ഇൻകമിംഗ് കോളുകൾക്ക് പോലും പണം നൽകേണ്ടിയിരുന്ന ആദ്യകാല മൊബൈൽ കാലഘട്ടത്തിൽ ഫോൺ ഉപയോഗം പ്രധാനമായും സാമ്പത്തികമായി ശേഷിയുള്ളവരിൽ ഒതുങ്ങി.
പിന്നീടാണ് മൊബൈൽ ഫോൺ സാധാരണക്കാരിലേക്കും വ്യാപിച്ചത്. 2002ൽ ബി.എസ്.എൻ.എൽ ഇൻകമിംഗ് കോളുകൾ സൗജന്യമാക്കിയതോടെ മൊബൈൽ ഉപയോഗത്തിന്റെ സ്വഭാവത്തിൽ വലിയ മാറ്റമുണ്ടായി. തുടർന്ന് നിരക്കുകൾ കുറഞ്ഞതും പുതിയ ടെലികോം കമ്പനികൾ രംഗത്തെത്തിയതും മൊബൈൽ ഫോണിനെ ജനകീയമാക്കി.
കേരളത്തിലെ ആ ചരിത്ര കോൾ നടക്കുന്നതിന് ഒരു വർഷം മുമ്പാണ് ഇന്ത്യയിൽ മൊബൈൽ ടെലിഫോൺ സേവനത്തിന് തുടക്കമായത്. 1995 ജൂലൈ 31ന് അന്നത്തെ പശ്ചിമ ബംഗാൾ മുഖ്യമന്ത്രി ജ്യോതി ബസു, കേന്ദ്ര ടെലികോം മന്ത്രി സുഖ് റാമുമായി മൊബൈൽ ഫോണിലൂടെ നടത്തിയ സംഭാഷണമാണ് രാജ്യത്തെ ആദ്യ മൊബൈൽ ഫോൺ കോൾ ആയി രേഖപ്പെടുത്തുന്നത്. കൊൽക്കത്തയിൽ നിന്നായിരുന്നു ആ ചരിത്ര വിളി.
അന്ന് കൈയിൽ ഒതുങ്ങിയിരുന്ന ഒരു മൊബൈൽ ഫോൺ ഭാവിയിലെ ആശയവിനിമയ ലോകത്തെ എത്രത്തോളം മാറ്റിമറിക്കുമെന്ന് ആരും കരുതിയിരുന്നില്ല. മൂന്ന് പതിറ്റാണ്ടുകൾക്കിപ്പുറം മൊബൈൽ ഫോൺ ഫോൺ വിളിക്കാനുള്ള ഉപകരണം മാത്രമല്ല; വാർത്ത, ബാങ്കിങ്, വിദ്യാഭ്യാസം, വിനോദം, വ്യാപാരം, സാമൂഹിക ഇടപെടൽ തുടങ്ങി ജീവിതത്തിന്റെ ഭൂരിഭാഗം മേഖലകളെയും ബന്ധിപ്പിക്കുന്ന സാങ്കേതിക ഉപകരണമായി മാറിയിരിക്കുന്നു.
1996 സെപ്റ്റംബർ 17ന് തകഴി ശിവശങ്കരപ്പിള്ള പറഞ്ഞ ആ ആദ്യ ‘ഹലോ’—കേരളത്തിന്റെ ടെലികോം ചരിത്രത്തിലെ ഒരു ചെറിയ സംഭാഷണമായിരുന്നെങ്കിലും, അതിന് പിന്നാലെ തുറന്നത് ആശയവിനിമയത്തിന്റെ ഒരു പുതിയ ലോകമായിരുന്നു.
ന്യൂസ്ഡെസ്ക് കേരളടൈംസ്
