ഡോക്ടർമാർക്കും പ്രൊഫസർമാർക്കും സമാനമായി പേരിന് മുമ്പിൽ ചേർക്കാം; അധ്യാപക മഹത്വത്തിന് സർക്കാർ അംഗീകാരം
ബെംഗളൂരു: ഡോക്ടർമാർക്ക് ‘ഡോ.’, പ്രൊഫസർമാർക്ക് ‘പ്രൊഫ.’ എന്നിങ്ങനെ പേരിന് മുമ്പിൽ ഉപയോഗിക്കുന്ന പദവികൾക്ക് സമാനമായി കർണാടകയിലെ അധ്യാപകർക്കും ഇനി പേരിന് മുമ്പിൽ ‘TR’ ചേർക്കാം. അധ്യാപക ദിനത്തോടനുബന്ധിച്ച് കർണാടക സർക്കാർ ഇതുസംബന്ധിച്ച പ്രഖ്യാപനം നടത്തി.
വിദ്യാർഥികളുടെ ജീവിതത്തിന് ദിശാബോധം നൽകുന്നതിലും കരിയർ തിരഞ്ഞെടുപ്പുകളിൽ മാർഗനിർദേശം നൽകുന്നതിലും ആത്മവിശ്വാസം വളർത്തുന്നതിലും അധ്യാപകർ വഹിക്കുന്ന നിർണായക പങ്ക് സർക്കാർ ഉത്തരവിൽ പ്രത്യേകം എടുത്തുപറയുന്നു. ഭരണഘടനാ മൂല്യങ്ങളും ശാസ്ത്രീയ മനോഭാവവും വിദ്യാർഥികളിൽ വളർത്തുന്നതിലും അധ്യാപകർ നിർണായക പങ്കാണ് വഹിക്കുന്നത്.
അറിവ് പകർന്നുനൽകുക മാത്രമല്ല, ഒരു തലമുറയുടെ ചിന്തയെയും സ്വഭാവത്തെയും ഭാവിയെയും രൂപപ്പെടുത്തുന്നവരാണ് അധ്യാപകർ എന്ന ആശയത്തിന് ഊന്നൽ നൽകിയാണ് പുതിയ അംഗീകാരം.
കുഡ്ലിഗിയിൽ നടന്ന അധ്യാപകദിന പരിപാടിയിൽ സംസാരിച്ച മുഖ്യമന്ത്രി ഡി.കെ. ശിവകുമാർ, കർണാടകയിൽ 4.5 ലക്ഷത്തിലധികം അധ്യാപകരുണ്ടെന്നും സമൂഹത്തിന് വിലമതിക്കാനാകാത്ത സംഭാവനകൾ നൽകുന്ന അധ്യാപകർ പ്രത്യേക ബഹുമതി അർഹിക്കുന്നവരാണെന്നും പറഞ്ഞു.
അധ്യാപകന്റെ സ്ഥാനം ഒരു തൊഴിൽ എന്നതിലുപരി അറിവും മൂല്യങ്ങളും പകർന്ന് സമൂഹത്തിന്റെ ഭാവി രൂപപ്പെടുത്തുന്ന ദൗത്യമാണെന്ന സന്ദേശം കൂടിയാണ് ‘TR’ എന്ന പുതിയ ബഹുമതി മുന്നോട്ടുവയ്ക്കുന്നത്.
