ചാലക്കുടി: പവർകട്ടും വൈദ്യുതി ക്ഷാമവും തുടരുന്ന സാഹചര്യത്തിൽ വൈദ്യുതി ഉൽപ്പാദനം വർധിപ്പിക്കുന്നതിനായി അതിരപ്പിള്ളി ജലവൈദ്യുത പദ്ധതി നടപ്പാക്കുന്നതിനെക്കുറിച്ച് സർക്കാർ ആലോചിക്കണമെന്ന് കോടശേരി കാരുണ്യ സോഷ്യൽ വർക്കിംഗ് ഗ്രൂപ്പ് ഭാരവാഹികളുടെ യോഗം ആവശ്യപ്പെട്ടു.
അതിരപ്പിള്ളി വെള്ളച്ചാട്ടത്തിന് മുകളിലായി അണക്കെട്ട് നിർമിക്കുമ്പോൾ പ്രകൃതിരമണീയമായ വെള്ളച്ചാട്ടത്തിന്റെ സൗന്ദര്യത്തിനും പരിസ്ഥിതിക്കും കോട്ടം തട്ടുമോ എന്നത് വിശദമായി പരിശോധിക്കണമെന്നും വിഷയത്തിൽ സമഗ്രമായ പഠനം നടത്തണമെന്നും യോഗം ആവശ്യപ്പെട്ടു.
പദ്ധതിയുമായി ബന്ധപ്പെട്ട് ആദിവാസി വിഭാഗങ്ങളും പുഴ സംരക്ഷണ സമിതിയും ഉയർത്തുന്ന എതിർപ്പുകൾ അവഗണിക്കണമെന്നും യോഗം ആവശ്യപ്പെട്ടു. ആദിവാസി കുടുംബങ്ങളെ സർക്കാർ ഉടമസ്ഥതയിലുള്ള പ്ലാന്റേഷൻ കോർപ്പറേഷന്റെ ഭൂമിയിൽ പുനരധിവസിപ്പിക്കുന്നതിനുള്ള നടപടി സ്വീകരിക്കണമെന്നും പുഴ സംരക്ഷണ സമിതി അംഗങ്ങളുമായി ചർച്ച നടത്തി അവരുടെ ആശങ്കകൾ പരിഹരിക്കണമെന്നും യോഗം ചൂണ്ടിക്കാട്ടി.
സംസ്ഥാനത്തെ വൈദ്യുതി ക്ഷാമം പരിഹരിക്കുന്നതിന് സർക്കാർ യുദ്ധകാലാടിസ്ഥാനത്തിൽ നടപടികൾ സ്വീകരിക്കണമെന്നും യോഗം ആവശ്യപ്പെട്ടു. ഇതുസംബന്ധിച്ച് കോടശേരി കാരുണ്യ സോഷ്യൽ വർക്കിംഗ് ഗ്രൂപ്പ് ഭാരവാഹികളായ കെ. എം. ജോസ്, വർഗീസ് പൊറായി, ഓമന ജോസ് എന്നിവർ മുഖ്യമന്ത്രിക്കും വൈദ്യുതി മന്ത്രിക്കും ചാലക്കുടി എം.എൽ.എ. സനീഷ് കുമാർ ജോസഫിനും നിവേദനം നൽകി.
ന്യൂസ് ഡസ്ക് കേരളടൈംസ്.
