വയനാട് ചൂരൽമല–മുണ്ടക്കൈ ദുരന്തം: രണ്ട് വർഷങ്ങൾ പിന്നിട്ടിട്ടും മായാത്ത മുറിവുകൾ

2026 ജൂലൈ 30 – കേരളടൈംസ്

2024 ജൂലൈ 30-ന്റെ പുലർച്ചെ വയനാടിന്റെ ചരിത്രത്തിൽ ഒരിക്കലും മായാത്ത കറുത്ത അധ്യായം എഴുതപ്പെട്ട ദിനം. പുഞ്ചിരിമട്ടത്ത് നിന്ന് ഉരുണ്ടിറങ്ങിയ മണ്ണും മലവെള്ളവും പാറക്കെട്ടുകളും മുണ്ടക്കൈ, ചൂരൽമല ഉൾപ്പെടെയുള്ള പ്രദേശങ്ങളെ നിമിഷങ്ങൾക്കകം വിഴുങ്ങി. നൂറുകണക്കിന് ജീവനുകളെയും അനേകം കുടുംബങ്ങളുടെ സ്വപ്നങ്ങളെയും ആ ദുരന്തം കവർന്നെടുത്തു.

ഔദ്യോഗിക കണക്കുകൾ പ്രകാരം 298 പേർ ദുരന്തത്തിൽ മരണപ്പെട്ടു. 32 പേരെ പിന്നീട് മരിച്ചതായി പ്രഖ്യാപിച്ചു. എന്നാൽ കണക്കുകൾക്കപ്പുറം, ഓരോ നഷ്ടവും ഒരു കുടുംബത്തിന്റെ ലോകമായിരുന്നു. ഇന്നും ആ മുറിവുകൾ അനേകം ഹൃദയങ്ങളിൽ ഉണങ്ങാതെ കിടക്കുന്നു.

മണ്ണിനടിയിൽ മറഞ്ഞത് മനുഷ്യജീവിതങ്ങൾ മാത്രമായിരുന്നില്ല; കുഞ്ഞുങ്ങളുടെ പുഞ്ചിരികളും മാതാപിതാക്കളുടെ പ്രതീക്ഷകളും അധ്വാനത്തിന്റെ ഫലങ്ങളും അനേകം സ്വപ്നങ്ങളുമായിരുന്നു.

വയനാട് ദുരന്തം ഒരു ദുഃഖസ്മരണ മാത്രമല്ല, പ്രകൃതിയോടുള്ള നമ്മുടെ ഉത്തരവാദിത്തത്തെക്കുറിച്ചുള്ള ശക്തമായ ഓർമ്മപ്പെടുത്തൽ കൂടിയാണ്. ദുരന്തസാധ്യതകൾ തിരിച്ചറിയാനും പരിസ്ഥിതി സംരക്ഷിക്കാനും മുൻകരുതലുകൾ ശക്തിപ്പെടുത്താനും നമ്മെ വീണ്ടും വീണ്ടും ഓർമ്മിപ്പിക്കുന്ന ദിനം.

ഈ കറുത്ത ദിനത്തിൽ ദുരന്തത്തിൽ ജീവൻ നഷ്ടമായ എല്ലാ പ്രിയപ്പെട്ടവരെയും കേരള ടൈംസ് ആദരപൂർവ്വം സ്മരിക്കുന്നു. അവരുടെ ആത്മാക്കൾക്ക് നിത്യശാന്തി നേരുന്നു. ദുഃഖം പേറുന്ന കുടുംബങ്ങൾക്കും രക്ഷാപ്രവർത്തനങ്ങളിൽ പങ്കാളികളായ എല്ലാവർക്കും ആദരവും പ്രാർത്ഥനയും അർപ്പിക്കുന്നു.

“ഓർമ്മകൾ മായുന്നില്ല; അവ നമ്മെ കൂടുതൽ ജാഗ്രതയോടെയും കൂടുതൽ മാനവികതയോടെയും ജീവിക്കാൻ പഠിപ്പിക്കുന്നു.” 🙏