15 വർഷങ്ങൾക്ക് ശേഷം ‘മൗനം’ വീണ്ടും തിയേറ്ററിലേക്ക്.

‘കുറിവരച്ചാലും കുരിശുവരച്ചാലും…’ വീണ്ടും മുഴങ്ങാൻ ഒരുങ്ങുന്നു
മലയാള സിനിമാപ്രേമികൾക്ക് സന്തോഷവാർത്ത. ഒരുകാലത്ത് വലിയ ചർച്ചകൾക്ക് വഴിവെച്ച ‘കുറിവരച്ചാലും കുരിശുവരച്ചാലും…’ എന്ന ഗാനത്തിലൂടെ മതനിരപേക്ഷതയുടെ പ്രതീകമായി മാറിയ ‘മൗനം’ എന്ന ചിത്രം 15 വർഷങ്ങൾക്ക് ശേഷം വീണ്ടും പ്രദർശനത്തിനെത്തുന്നു.
2011-ൽ ചിത്രീകരിച്ച ചിത്രം വിവിധ നിയമക്കുരുക്കുകളിൽ അകപ്പെട്ടതിനെ തുടർന്ന് റിലീസ് വൈകുകയായിരുന്നു. സിനിമയ്ക്കായി സ്വന്തം വീട് പോലും നഷ്ടപ്പെട്ട സംവിധായകൻ സുരേഷ് മച്ചാട്, പിന്നീട് സമീപത്തെ ഒറ്റമുറി വീട്ടിൽ താമസിച്ചുകൊണ്ട് ചിത്രത്തെ പ്രേക്ഷകരിലെത്തിക്കാനുള്ള പോരാട്ടം തുടർന്നു. ആ വർഷങ്ങളായുള്ള പരിശ്രമത്തിനാണ് ഇപ്പോൾ ഫലമാകുന്നത്.
ചിത്രം ഇതിനോടകം ഡിജിറ്റൽ ഫോർമാറ്റിലേക്ക് മാറ്റിക്കഴിഞ്ഞു. ഇതിനായി ഏകദേശം 10 ലക്ഷം രൂപ ചെലവഴിക്കാൻ സിയോൺ ഷാജു മുന്നോട്ടുവന്നതോടെയാണ് ‘മൗന’ത്തിന്റെ രണ്ടാം വരവ് യാഥാർഥ്യമായത്.
മാടമ്പ് കുഞ്ഞുകുട്ടന്റെ ‘കോളനി’ എന്ന നോവലിനെ ആസ്പദമാക്കി, തിരക്കഥയും അദ്ദേഹം തന്നെയാണ് ഒരുക്കിയത്. എം.ഡി. രാജേന്ദ്രൻ രചിച്ച് ഈണം നൽകിയ, യേശുദാസ് ആലപിച്ച ‘കുറിവരച്ചാലും കുരിശുവരച്ചാലും…’ എന്ന ഗാനം ഇന്നും മലയാളികളുടെ മനസ്സിൽ ഇടംപിടിച്ചിരിക്കുന്നു.
സൈജു കുറുപ്പ് നായകനാകുന്ന ചിത്രത്തിൽ തിലകൻ, മാടമ്പ് കുഞ്ഞുകുട്ടൻ, മുല്ലനേഴി, ഇന്നസെന്റ്, സലിംകുമാർ, ശിവജി ഗുരുവായൂർ എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു.
വർഷങ്ങളുടെ കാത്തിരിപ്പിന് വിരാമമിട്ട്, മലയാള സിനിമയുടെ ഒരു നഷ്ടപ്പെട്ട അധ്യായം വീണ്ടും വെള്ളിത്തിരയിൽ എത്തുമ്പോൾ, സിനിമാസ്വാദകർക്ക് അത് ഒരു പ്രത്യേക അനുഭവമാകുമെന്നുറപ്പാണ്.