ഗുരുവായൂർ: ലക്ഷക്കണക്കിന് തീർത്ഥാടകർ എത്തുന്ന ഗുരുവായൂർ ക്ഷേത്ര സന്നിധിയിൽ തീപിടുത്തം. ക്ഷേത്ര നടയിലെ ‘വൈജയന്തി’ കെട്ടിടത്തിലാണ് ബുധനാഴ്ച്ച രാവിലെ ഒമ്പതരയോടെ തീപിടുത്തമുണ്ടായത്. കെട്ടിടത്തിൽ പ്രവർത്തിക്കുന്ന ദേവസ്വം ആരോഗ്യ വിഭാഗത്തിന്റെ സ്റ്റോർ റൂമിലാണ് ആദ്യമായി തീ പടർന്നത്.
രാവിലെ സ്റ്റോർ റൂമിൽ നിന്നും വലിയ തോതിൽ പുക ഉയരുന്നത് ശ്രദ്ധയിൽപ്പെട്ട ജീവനക്കാരും ഭക്തരും ഉടൻ തന്നെ അഗ്നിശമന സേനയെ വിവരമറിയിക്കുകയായിരുന്നു. ഗുരുവായൂർ ഫയർ സ്റ്റേഷൻ ഓഫീസർ എസ്.ഡി. സജിത്ത് ലാലിന്റെ നേതൃത്വത്തിലുള്ള സംഘം ഉടനടി സ്ഥലത്തെത്തി യുദ്ധകാലാടിസ്ഥാനത്തിൽ രക്ഷാപ്രവർത്തനം ആരംഭിച്ചു. അരമണിക്കൂറോളം നീണ്ട കഠിനശ്രമത്തിനൊടുവിലാണ് തീ പൂർണ്ണമായും നിയന്ത്രണവിധേയമാക്കിയത്.
വ്യാപക നാശനഷ്ടം; ഷോർട്ട് സർക്യൂട്ട് എന്ന് പ്രാഥമിക നിഗമനം
തീപിടുത്തത്തിൽ ആരോഗ്യ വിഭാഗം സ്റ്റോറിലുണ്ടായിരുന്ന ഭൂരിഭാഗം സാധനങ്ങളും കത്തിനശിച്ചു. ശുചീകരണത്തിനായി സൂക്ഷിച്ചിരുന്ന ബ്ലീച്ചിങ് പൗഡർ, സോപ്പുപൊടി എന്നിവയും വിലപിടിപ്പുള്ള ദേവസ്വം പ്രസിദ്ധീകരണങ്ങളും മരത്തിന്റെ ഫർണിച്ചറുകളും പൂർണ്ണമായും ചാരമായി മാറി.
പ്രാഥമിക പരിശോധനയിൽ ഷോർട്ട് സർക്യൂട്ടാണ് തീപിടുത്തത്തിന് കാരണമെന്നാണ് ഫയർഫോഴ്സ് ഉദ്യോഗസ്ഥർ വ്യക്തമാക്കുന്നത്.
ക്ഷേത്ര സന്നിധിക്ക് തൊട്ടടുത്തുള്ള കെട്ടിടമായതിനാൽ വലിയൊരു അപകടസാധ്യതയാണ് ഫയർഫോഴ്സിന്റെയും ദേവസ്വം ജീവനക്കാരുടെയും കൃത്യസമയത്തുള്ള ഇടപെടൽ മൂലം ഒഴിവായത്. സംഭവത്തെ തുടർന്ന് പ്രദേശത്ത് സുരക്ഷാ പരിശോധനകൾ ശക്തമാക്കിയിട്ടുണ്ട്.
