പത്തനംതിട്ട | 2026 ഒക്ടോബർ 10
-സംസ്ഥാന സർക്കാരുകളുടെ സോളാർ പ്രോത്സാഹന പദ്ധതികളിൽ വിശ്വാസമർപ്പിച്ച് ബാങ്ക് വായ്പയെടുത്തും ജീവിതസമ്പാദ്യം വിനിയോഗിച്ചും വീടുകളിൽ പുരപ്പുറ സോളാർ പ്ലാന്റുകൾ സ്ഥാപിച്ച ഉപഭോക്താക്കളെ പ്രതിസന്ധിയിലാക്കി കെ.എസ്.ഇ.ബിയുടെ അനാസ്ഥയെന്ന് ഇന്ത്യൻ കൺസ്യൂമേഴ്സ് ഫോറം. പ്ലാന്റുകളുടെ നിർമാണം പൂർത്തിയായിട്ടും നെറ്റ് മീറ്ററുകൾ സ്ഥാപിക്കാത്തതുമൂലം ഉപഭോക്താക്കൾക്ക് അർഹമായ പ്രയോജനം ലഭിക്കുന്നില്ലെന്നും പ്രശ്നത്തിൽ അടിയന്തര ഇടപെടൽ വേണമെന്നും ഫോറത്തിന്റെ കേന്ദ്രകമ്മിറ്റി യോഗം ആവശ്യപ്പെട്ടു.
സംസ്ഥാനത്തുടനീളം പതിനായിരക്കണക്കിന് അപേക്ഷകരും പത്തനംതിട്ട ജില്ലയിൽ മാത്രം ആയിരത്തിലധികം ഉപഭോക്താക്കളും നെറ്റ് മീറ്ററുകൾക്കായി കാത്തിരിക്കുകയാണെന്നാണ് ഫോറത്തിന്റെ കണക്ക്. ഇതിൽ ത്രീ-ഫേസ് മീറ്ററുകളുടെ കടുത്ത ക്ഷാമം സ്ഥിതി കൂടുതൽ ഗുരുതരമാക്കിയിരിക്കുകയാണ്. നിക്ഷേപം നടത്തി പ്ലാന്റുകൾ സ്ഥാപിച്ചിട്ടും വൈദ്യുതി ഉൽപ്പാദനത്തിന്റെ പൂർണ പ്രയോജനം ലഭിക്കാത്ത സാഹചര്യം ഉപഭോക്താക്കൾക്ക് കനത്ത സാമ്പത്തിക ബാധ്യതയാണ് സൃഷ്ടിക്കുന്നത്.
സോളാർ പ്ലാന്റ് സ്ഥാപിക്കുന്നതിനായി എടുത്ത വായ്പയുടെ തിരിച്ചടവിനൊപ്പം സാധാരണ വൈദ്യുതി ബില്ലും അടയ്ക്കേണ്ടിവരുന്നത് കുടുംബങ്ങളുടെ സാമ്പത്തിക ഭദ്രതയെ ബാധിക്കുന്നു. വൈദ്യുതി ചെലവ് കുറയ്ക്കാമെന്ന പ്രതീക്ഷയിൽ പദ്ധതിയിൽ പങ്കാളികളായവർക്ക്, സംവിധാനങ്ങൾ സമയബന്ധിതമായി പ്രവർത്തനക്ഷമമാക്കാത്തതിലൂടെ അധിക ബാധ്യത നേരിടേണ്ടിവരുന്നത് നീതീകരിക്കാനാവില്ലെന്നാണ് ഫോറത്തിന്റെ നിലപാട്.
സൗരോർജ ഉപയോഗം പ്രോത്സാഹിപ്പിക്കുകയും പരമ്പരാഗത ഊർജസ്രോതസ്സുകളെ ആശ്രയിക്കുന്നത് കുറയ്ക്കുകയും ചെയ്യുകയാണ് ഇത്തരം പദ്ധതികളുടെ ലക്ഷ്യം. എന്നാൽ, പ്ലാന്റുകൾ സ്ഥാപിച്ചിട്ടും ആവശ്യമായ മീറ്ററുകൾ ലഭിക്കാത്തതിനാൽ നിക്ഷേപത്തിന്റെ പ്രയോജനം വൈകുന്നത് പദ്ധതിയുടെ ലക്ഷ്യത്തെത്തന്നെ ചോദ്യം ചെയ്യുന്നതാണ്. ഉപഭോക്താക്കൾക്ക് സാമ്പത്തിക നേട്ടം ഉറപ്പാക്കേണ്ട സംവിധാനങ്ങൾ തന്നെ അവർക്കു ബാധ്യതയായി മാറുന്ന സാഹചര്യം അവസാനിപ്പിക്കണമെന്നും ഫോറം ആവശ്യപ്പെട്ടു.
മീറ്റർ വിതരണം സുതാര്യമാക്കണം
നെറ്റ് മീറ്ററുകളുടെ ലഭ്യത ഉറപ്പാക്കി മാസങ്ങളായി കാത്തിരിക്കുന്ന ഉപഭോക്താക്കൾക്ക് അടിയന്തരമായി മീറ്ററുകൾ സ്ഥാപിച്ചുനൽകാൻ കെ.എസ്.ഇ.ബി നടപടി സ്വീകരിക്കണമെന്ന് യോഗം ആവശ്യപ്പെട്ടു. ഓരോ സെക്ഷൻ ഓഫീസിലെയും അപേക്ഷകരുടെ മുൻഗണനാക്രമ പട്ടിക പരസ്യപ്പെടുത്തണം. മീറ്റർ വിതരണത്തിൽ സുതാര്യത ഉറപ്പാക്കുകയും അപേക്ഷകർക്ക് തങ്ങളുടെ അപേക്ഷയുടെ നിലവിലെ സ്ഥിതി അറിയാൻ സംവിധാനം ഏർപ്പെടുത്തുകയും വേണം.
ഉപഭോക്താക്കളുടെ സാമ്പത്തിക താൽപര്യങ്ങളെ ബാധിക്കുന്ന ഈ പ്രശ്നത്തിൽ സർക്കാരും കെ.എസ്.ഇ.ബിയും ഉത്തരവാദിത്വത്തോടെ ഇടപെടണം. പരാതികൾക്ക് പരിഹാരം കാണുന്നതിൽ വീഴ്ചയുണ്ടായാൽ ബന്ധപ്പെട്ടവർക്കെതിരെ നിയമനടപടികൾക്കായി കോടതിയെ സമീപിക്കാനും യോഗം തീരുമാനിച്ചു.
പദ്ധതികളിൽ വിശ്വാസമർപ്പിച്ച് പണം മുടക്കിയ ഉപഭോക്താക്കൾക്ക് സമയബന്ധിതമായി സേവനം ലഭ്യമാക്കേണ്ടത് ബന്ധപ്പെട്ട സംവിധാനങ്ങളുടെ ഉത്തരവാദിത്വമാണ്. നെറ്റ് മീറ്റർ ക്ഷാമം പരിഹരിക്കുന്നതിൽ ഇനിയും കാലതാമസം വരുത്തുന്നത് ഉപഭോക്താക്കളുടെ വിശ്വാസത്തെ ബാധിക്കുമെന്നും ഫോറം മുന്നറിയിപ്പ് നൽകി.
ഇന്ത്യൻ കൺസ്യൂമേഴ്സ് ഫോറം കേന്ദ്രകമ്മിറ്റി യോഗത്തിൽ സലിൽ വയലാത്തല അധ്യക്ഷത വഹിച്ചു. എസ്. കൃഷ്ണകുമാർ, എൻ. പ്രസാദ്, പി. വിനോദ്കുമാർ, എസ്. അഞ്ജിത, സലീന എന്നിവർ പ്രസംഗിച്ചു.
ന്യൂസ്ഡെസ്‌ക് കേരള ടൈംസ്
