ധർമേന്ദ്ര പ്രധാൻ രാജിവയ്ക്കില്ലെന്ന സൂചന; ദേശീയ പരീക്ഷാ ഏജൻസിയിൽ വൻ അഴിച്ചുപണി, പ്രതിഷേധം കടുപ്പിക്കുമെന്ന് സിജെപി

ന്യൂഡൽഹി: കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവയ്ക്കണമെന്ന പ്രതിഷേധക്കാരുടെ പ്രധാന ആവശ്യം കേന്ദ്രസർക്കാർ അംഗീകരിക്കാനുള്ള സാധ്യത കുറവാണെന്ന സൂചനകൾ പുറത്തുവരുന്നു. എന്നാൽ ദേശീയ പരീക്ഷാ സംവിധാനത്തിൽ വിശ്വാസ്യത പുനഃസ്ഥാപിക്കുന്നതിനായി ദേശീയ പരീക്ഷാ ഏജൻസിയിൽ (NTA) വ്യാപകമായ ഭരണപരിഷ്‌കാരങ്ങൾ നടപ്പാക്കാനാണ് കേന്ദ്രത്തിന്റെ നീക്കം. ചോദ്യപേപ്പർ ചോർച്ചയും പരീക്ഷാ ക്രമക്കേടുകളും തടയാൻ ഉദ്യോഗസ്ഥരെ കൂട്ടത്തോടെ മാറ്റുന്നതിനൊപ്പം, ചോദ്യപേപ്പർ ചോർത്തുന്നവർക്കെതിരെ കൂടുതൽ കർശനമായ നിയമനടപടികളും ശിക്ഷയും ഉറപ്പാക്കുന്ന നടപടികളും പ്രഖ്യാപിക്കാനാണ് സാധ്യത.
പ്രതിഷേധത്തിന് നേതൃത്വം നൽകുന്ന സിജെപിയുമായി നടക്കുന്ന ചർച്ചകളിൽ മറ്റ് ആവശ്യങ്ങൾ പരിഗണിക്കാൻ സർക്കാർ തയ്യാറാണെങ്കിലും, വിദ്യാഭ്യാസ മന്ത്രിയുടെ രാജി എന്ന ആവശ്യത്തിൽ വിട്ടുവീഴ്ച ചെയ്യാൻ സാധ്യതയില്ലെന്നാണ് കേന്ദ്രസർക്കാർ വൃത്തങ്ങൾ നൽകുന്ന സൂചന. ധർമേന്ദ്ര പ്രധാൻ രാജിവച്ചാൽ അത് സർക്കാരിന്റെ ദൗർബല്യമായി വിലയിരുത്തപ്പെടുകയും ഭാവിയിൽ സമാന ആവശ്യങ്ങളുമായി കൂടുതൽ പ്രതിഷേധങ്ങൾക്ക് വഴിവെക്കുകയും ചെയ്യുമെന്നാണ് കേന്ദ്രത്തിന്റെ വിലയിരുത്തൽ.
അതേസമയം, രാജിയെന്ന ആവശ്യം അംഗീകരിക്കാത്ത പക്ഷം രാജ്യവ്യാപകമായി ശക്തമായ പ്രതിഷേധം സംഘടിപ്പിക്കുമെന്ന് സിജെപി നേരത്തേ മുന്നറിയിപ്പ് നൽകിയിട്ടുണ്ട്. 24 മണിക്കൂറിനുള്ളിൽ പാർലമെന്റിലേക്കുള്ള മാർച്ച് വീണ്ടും ആരംഭിക്കുമെന്നും സംഘടന വ്യക്തമാക്കിയിട്ടുണ്ട്. ഇതോടെ ഡൽഹിയിൽ വീണ്ടും രാഷ്ട്രീയ സംഘർഷാവസ്ഥ രൂപപ്പെടാനുള്ള സാധ്യത ഉയർന്നിരിക്കുകയാണ്.
ഇതിനിടെ, വിഷയത്തിൽ ആർഎസ്എസ് സർസംഘചാലക് മോഹൻ ഭാഗവത് പ്രതികരിച്ചു. പരീക്ഷാ വിവാദങ്ങളിൽ ആശങ്കപ്പെടുന്ന വിദ്യാർഥികളുടെയും കുട്ടികളുടെയും ചോദ്യങ്ങൾക്ക് ഉത്തരവാദിത്വത്തോടെ മറുപടി നൽകേണ്ടത് ഭരണകൂടത്തിന്റെ കടമയാണെന്നും, സമവായവും തുറന്ന ചർച്ചയുമാണ് നിലവിലെ സാഹചര്യത്തിൽ ഏറ്റവും ഉചിതമായ മാർഗമെന്നും അദ്ദേഹം അഭിപ്രായപ്പെട്ടു.
സുരക്ഷാ മുൻകരുതലിന്റെ ഭാഗമായി ജന്തർ മന്ദർ പരിസരത്ത് ഡൽഹി പൊലീസ് വീണ്ടും സുരക്ഷ ശക്തമാക്കിയിട്ടുണ്ട്. കൂടുതൽ ബാരിക്കേഡുകൾ സ്ഥാപിക്കുകയും അധിക പൊലീസ് സേനയെ വിന്യസിക്കുകയും ചെയ്തിട്ടുണ്ട്. പ്രതിഷേധം വ്യാപിക്കുമെന്ന ആശങ്കയെ തുടർന്ന് നഗരത്തിലെ 18 മെട്രോ സ്റ്റേഷനുകൾ ഇന്നും അടച്ചിടുമെന്നാണ് വിവരം. യാത്രക്കാർക്ക് ഗതാഗത നിയന്ത്രണങ്ങളും കർശന പരിശോധനകളും തുടരുകയാണ്.
അതേസമയം, പ്രതിപക്ഷ പാർട്ടികൾ കേന്ദ്രസർക്കാരിനെതിരെ കടുത്ത വിമർശനവുമായി രംഗത്തെത്തി. വിദ്യാഭ്യാസ മന്ത്രിയുടെ രാജിയിൽ കുറഞ്ഞ ഒരു ഒത്തുതീർപ്പിനും തയ്യാറാകാൻ പാടില്ലെന്നാണ് പ്രതിപക്ഷത്തിന്റെ നിലപാട്. പരീക്ഷാ സംവിധാനത്തിന്റെ വിശ്വാസ്യത പൂർണമായും തകർന്ന സാഹചര്യത്തിൽ ഉത്തരവാദിത്വം ഏറ്റെടുത്ത് മന്ത്രി രാജിവയ്ക്കണമെന്നാണ് അവർ ആവർത്തിച്ച് ആവശ്യപ്പെടുന്നത്.
പരീക്ഷാ ക്രമക്കേടുകളെ ചൊല്ലിയുള്ള രാഷ്ട്രീയ വിവാദവും വിദ്യാർഥി പ്രതിഷേധവും കൂടുതൽ ശക്തമാകുന്നതിനിടെ, കേന്ദ്രസർക്കാരും പ്രതിഷേധ സംഘടനകളും തമ്മിലുള്ള ചർച്ചകളുടെ ഫലമാണ് ഇനി രാജ്യത്തിന്റെ ശ്രദ്ധാകേന്ദ്രമാകുന്നത്.