കോഴിക്കോട് :
ഓണം സീസണിൽ സുരക്ഷ ഉറപ്പാക്കാൻ പരിശോധനകൾ ശക്തമാക്കണം
കേരളത്തിൽ ആഘോഷവേളകളിൽ ബിരിയാണിക്കും മധുരപലഹാരങ്ങൾക്കും സുഗന്ധം നൽകാൻ വ്യാപകമായി ഉപയോഗിക്കുന്ന റോസ് വാട്ടറിൽ മാരകമായ രാസവസ്തുക്കൾ കലർത്തുന്നതായി ഭക്ഷ്യസുരക്ഷാ വിഭാഗത്തിന്റെ കണ്ടെത്തൽ. കോഴിക്കോട് നല്ലളത്തുള്ള സ്ഥാപനത്തിലാണ് ‘ഓപ്പറേഷൻ ഓണം’ മിന്നൽ പരിശോധനയുടെ ഭാഗമായി തട്ടിപ്പ് പുറത്തുകൊണ്ടുവന്നത്. തുടർന്ന് അധികൃതർ സ്ഥാപനം അടപ്പിച്ചു.
സോപ്പുകളും അഗർബത്തികളും നിർമിക്കാൻ മാത്രം അനുമതിയുള്ള ‘ഇൻഡസ്ട്രിയൽ ഗ്രേഡ്’ എസൻസാണ് റോസ് വാട്ടറിൽ ചേർത്തിരുന്നത്.
ഡിറ്റർജന്റുകളിലും സൗന്ദര്യവർദ്ധക വസ്തുക്കളിലും ഉപയോഗിക്കുന്ന ഈ രാസപദാർത്ഥം ഉള്ളിൽച്ചെന്നാൽ ഛർദി, ഗുരുതരമായ വയറിലെ അസ്വസ്ഥതകൾ തുടങ്ങിയ ആരോഗ്യപ്രശ്നങ്ങൾ ഉണ്ടാകാം.
അതീവ വൃത്തിഹീനമായ അന്തരീക്ഷത്തിൽ പ്രവർത്തിച്ച യൂണിറ്റിൽ എലികാഷ്ടം, കുപ്പിച്ചില്ലുകൾ, മാലിന്യങ്ങൾ എന്നിവ ചിതറിക്കിടക്കുന്ന നിലയിലായിരുന്നു.
യൂണിറ്റിൽ നിന്ന് ശേഖരിച്ച സാമ്പിളുകൾ ശാസ്ത്രീയ പരിശോധനയ്ക്കായി ലാബിലേക്ക് അയച്ചു. നഗരത്തിന്റെ വിവിധ ഭാഗങ്ങളിലേക്ക് ഇവിടുത്തെ ഉൽപ്പന്നങ്ങൾ വിതരണം ചെയ്തിട്ടുണ്ട്.
കേരളത്തിലെ ഏറ്റവും വലിയ കച്ചവട-ഉത്സവ സീസണാണ് ഓണം. ബിരിയാണി, പായസം, ഹൽവ എന്നിവയുടെ നിർമാണവും വിൽപ്പനയും ഈ സമയത്ത് വൻതോതിൽ വർദ്ധിക്കാറുണ്ട്. ലാഭക്കൊതി മൂലം ജനങ്ങളുടെ ജീവൻ വെച്ച് പന്താടുന്ന ഇത്തരം അനധികൃത യൂണിറ്റുകൾ ഈ സമയത്ത് സജീവമാകാൻ സാധ്യതയേറെയാണ്.
ജില്ലയിലുടനീളം തട്ടുകടകൾ മുതൽ വൻകിട നിർമാണ യൂണിറ്റുകൾ വരെ കൃത്യമായ മിന്നൽ പരിശോധനകൾ തുടരണം.
വ്യാജവും വിഷമയവുമായ ഉൽപ്പന്നങ്ങൾ വിപണിയിൽ എത്തുന്നില്ലെന്ന് ഉറപ്പാക്കാൻ ഭക്ഷ്യസുരക്ഷാ വകുപ്പ് സർവൈലൻസ് ടീമുകളെ വിന്യസിക്കണം.
പിടിച്ചെടുത്ത വ്യാജ റോസ് വാട്ടർ എത്തിച്ചേർന്ന ഹോട്ടലുകളിൽ നിന്നും കടകളിൽ നിന്നും അവ ഉടനടി പിടിച്ചെടുത്ത് നശിപ്പിക്കണം.
ജനങ്ങളുടെ ആരോഗ്യം മുൻനിർത്തി വ്യാജ ഉൽപ്പന്നങ്ങൾ നിർമിക്കുന്നവർക്കെതിരെ ജാമ്യമില്ലാ വകുപ്പുകൾ ചുമത്തി കർശന നിയമനടപടികൾ സ്വീകരിക്കേണ്ടതുണ്ട്.
ബിരിയാണി മിക്സിൽ മാരക രാസവസ്തു: കോഴിക്കോട്ട് ഭക്ഷ്യനിർമാണ യൂണിറ്റ് അടപ്പിച്ചു.
