പയ്യന്നൂരിൽ ഒന്നര വയസ്സുകാരൻ മരിച്ച സംഭവം: ഡോക്ടർമാർക്ക് ഗുരുതര വീഴ്ചയെന്ന് മെഡിക്കൽ ബോർഡ്; ക്രിമിനൽ കേസിന് ശുപാർശ

​കണ്ണൂർ: പയ്യന്നൂരിൽ ഒന്നര വയസ്സുകാരൻ ചികിത്സയ്ക്കിടെ മരിച്ച സംഭവത്തിൽ ഡോക്ടർമാർക്ക് ഗുരുതരമായ പിഴവ് സംഭവിച്ചതായി മെഡിക്കൽ ബോർഡിന്റെ കണ്ടെത്തൽ. പയ്യന്നൂർ ബേബി മെമ്മോറിയൽ ആശുപത്രിയിലെ ഡോക്ടർമാരുടെ ഭാഗത്തുനിന്ന് കുറ്റകരമായ അനാസ്ഥയുണ്ടായെന്നും, ഇവർക്കെതിരെ ക്രിമിനൽ കുറ്റം ചുമത്തി നിയമനടപടികളുമായി മുന്നോട്ടുപോകണമെന്നും അഞ്ചംഗ മെഡിക്കൽ ബോർഡ് ശുപാർശ ചെയ്തു.
​കേസിൽ നിർണായകമാകുന്ന മെഡിക്കൽ ബോർഡിന്റെ കണ്ടെത്തലുകൾ ഇപ്രകാരമാണ്:
​അനാവശ്യമായ ജനറൽ അനസ്തേഷ്യ: കുട്ടിക്ക് ജനറൽ അനസ്തേഷ്യ നൽകേണ്ട യാതൊരു സാഹചര്യവും ഉണ്ടായിരുന്നില്ല. ഇക്കാര്യം കുട്ടിയുടെ പോസ്റ്റ്മോർട്ടം റിപ്പോർട്ടിലും വ്യക്തമാണ്.
​ചികിത്സ വൈകിച്ചു: രാവിലെ 10.15-ന് ചികിത്സ തേടിയെത്തിയ കുട്ടിക്ക് വൈകിട്ട് 4.15-നാണ് അനസ്തേഷ്യ നൽകിയത്. ഇത്രയും സമയം ചികിത്സ വൈകിച്ചതിന് വ്യക്തമായ മറുപടി നൽകാൻ ആശുപത്രി അധികൃതർക്ക് കഴിഞ്ഞിട്ടില്ല.
​അനാവശ്യ ശസ്ത്രക്രിയ: വൈകുന്നേരമായപ്പോഴേക്കും കുട്ടിയുടെ മുറിവ് ഭേദപ്പെട്ടുവരികയായിരുന്നു. ആ സമയത്ത് അനസ്തേഷ്യ നൽകി ശസ്ത്രക്രിയ നടത്തേണ്ട സാഹചര്യം നിലനിന്നിരുന്നില്ല.
​സൗകര്യങ്ങളുടെ കുറവ്: അനസ്തേഷ്യ നൽകിയ പയ്യന്നൂരിലെ ആശുപത്രിയിൽ ഇതിനാവശ്യമായ മതിയായ സജ്ജീകരണങ്ങൾ ഉണ്ടായിരുന്നോ എന്നതിലും ബോർഡ് സംശയം പ്രകടിപ്പിച്ചു.
​വിഷയത്തിൽ കുറ്റക്കാരായ ഡോക്ടർമാർക്കെതിരെ അന്വേഷണം നടത്തി പൊലീസിന് നിയമനടപടികളിലേക്ക് കടക്കാമെന്ന് റിപ്പോർട്ടിൽ വ്യക്തമാക്കുന്നുണ്ട്. ബോർഡിന്റെ അന്തിമ റിപ്പോർട്ട് മൂന്ന് ദിവസത്തിനകം പൊലീസിന് കൈമാറും.
​കഴിഞ്ഞ ഞായറാഴ്ചയാണ് പയ്യന്നൂർ സ്വദേശികളായ സൂരജ്-വിജിഷ ദമ്പതികളുടെ ഏക മകൻ ദേവാൻഷ് ശൗര്യ കളിക്കുന്നതിനിടെ വീണ് പരിക്കേറ്റത്. ചുണ്ടിലും താടിയിലുമുണ്ടായ മുറിവിന് തുന്നലിടാനായി പയ്യന്നൂർ ബി.എം.എച്ച് ആശുപത്രിയിൽ പ്രവേശിപ്പിച്ച കുഞ്ഞിന് അനസ്തേഷ്യ നൽകിയതിന് പിന്നാലെ ആരോഗ്യസ്ഥിതി ഗുരുതരമാവുകയായിരുന്നു. തുടർന്ന് വിദഗ്ധ ചികിത്സയ്ക്കായി കണ്ണൂർ ബി.എം.എച്ച് ആശുപത്രിയിലേക്ക് മാറ്റിയെങ്കിലും വെള്ളിയാഴ്ച രാത്രിയോടെ കുഞ്ഞ് മരണത്തിന് കീഴടങ്ങി. ഡോക്ടർമാരുടെ വീഴ്ചയാണ് മരണത്തിന് കാരണമായതെന്ന് കുടുംബം നേരത്തെ തന്നെ ആരോപിച്ചിരുന്നു.