നിയമസഭയിൽ ഭരണ-പ്രതിപക്ഷ പോര് പുതിയ തലത്തിലേക്ക്! കർഷകരുടെ പേരിൽ കൊണ്ടുവന്ന മദ്യനയ ഭേദഗതി വൻകിടക്കാർക്കായി സതീശൻ സർക്കാർ അട്ടിമറിച്ചെന്ന് പ്രതിപക്ഷം ആരോപിക്കുമ്പോൾ, പ്രതിപക്ഷത്തെ കടുത്ത പരിഹാസത്തിൽ മുക്കി മുഖ്യമന്ത്രി വി.ഡി. സതീശൻ. ഒടുവിൽ ബില്ലിന്റെ ചർച്ച ബഹിഷ്കരിച്ച് പ്രതിപക്ഷ നേതാവ് പിണറായി വിജയന്റെ നേതൃത്വത്തിൽ എൽ.ഡി.എഫ് അംഗങ്ങൾ സഭയ്ക്ക് പുറത്തേക്ക്.
വീര്യം കുറഞ്ഞ മദ്യത്തിന്റെ നികുതി കുറച്ചതുമായി ബന്ധപ്പെട്ട തർക്കമാണ് ഇന്ന് സഭയെ പ്രക്ഷുബ്ധമാക്കിയത്. കർഷകരെ സഹായിക്കാനെന്ന പേരിൽ കൊണ്ടുവന്ന ഭേദഗതി, യഥാർത്ഥത്തിൽ വൻകിട മദ്യമുതലാളിമാരെ സഹായിക്കാനാണെന്ന് പ്രതിപക്ഷ നേതാവ് പിണറായി വിജയന്റെ നേതൃത്വത്തിൽ പ്രതിപക്ഷം സഭയിൽ ആഞ്ഞടിച്ചു.
“വീര്യം കുറഞ്ഞ മദ്യത്തിന്റെ നികുതി കുറച്ച നടപടി ബജറ്റിൽ ഒളിച്ചുകടത്തിയതാണ്! നിയമസഭയ്ക്ക് മുകളിൽ എക്സിക്യൂട്ടീവിനെ പ്രതിഷ്ഠിക്കാനാണ് സർക്കാർ ശ്രമം. സബ് ജക്ട് കമ്മിറ്റിക്ക് പോലും വിടാതെ ബിൽ പാസാക്കാനുള്ള നീക്കം ജനാധിപത്യ വിരുദ്ധമാണ്.”
എന്നാൽ പ്രതിപക്ഷത്തിന്റെ ഈ കനത്ത ആക്രമണങ്ങൾക്ക് മൂർച്ചയേറിയ പരിഹാസത്തിലൂടെയാണ് മുഖ്യമന്ത്രി വി.ഡി. സതീശൻ മറുപടി നൽകിയത്. കർഷകർക്ക് വേണ്ടിയുള്ള നയമാണെങ്കിൽ പ്രതിപക്ഷം എന്തിനാണ് ബക്കാർഡി പോലെയുള്ള വൻകിട കമ്പനികളുമായി ചർച്ച നടത്തിയത് എന്നായിരുന്നു മുഖ്യമന്ത്രിയുടെ ചോദ്യം. യു.ഡി.എഫ് സർക്കാരിന്റെ ബജറ്റിന്റെ ശോഭ കെടുത്താൻ പ്രതിപക്ഷവും ഒപ്പം ചില കോൺഗ്രസ് വിമർശകരും ഒത്തുകളിക്കുകയാണെന്ന് മുഖ്യമന്ത്രി ഒളിയമ്പെയ്തു. അത്തരം നീക്കങ്ങൾക്കൊന്നും വഴങ്ങുന്ന സർക്കാരല്ല ഇതെന്ന് ധനബില്ലിന്റെ ചർച്ചയ്ക്കുള്ള മറുപടിയിൽ മുഖ്യമന്ത്രി വി.ഡി. സതീശൻ വ്യക്തമാക്കി.
മുഖ്യമന്ത്രിയുടെ മറുപടിക്ക് പിന്നാലെ പ്രതിപക്ഷ നിരയിൽ നിന്ന് കടുത്ത പ്രതിഷേധമുയർന്നു. യുഡിഎഫിൽ മാത്രമല്ല, കേരളത്തിലാകെ ഈ മദ്യനയം ചർച്ച ചെയ്യാൻ തയ്യാറാണെന്ന് മുഖ്യമന്ത്രി വെല്ലുവിളിച്ചതോടെ സഭയിലെ തർക്കം മൂർച്ഛിച്ചു. ഒടുവിൽ സബ്ജക്ട് കമ്മിറ്റിക്ക് വിടാതെ ബിൽ പാസാക്കുന്നതിൽ പ്രതിഷേധിച്ച് പ്രതിപക്ഷ നേതാവ് പിണറായി വിജയന്റെ നേതൃത്വത്തിൽ പ്രതിപക്ഷം ധനബിൽ ചർച്ച ബഹിഷ്കരിച്ച് സഭയ്ക്ക് പുറത്തേക്ക് പോയി.
പ്രതിപക്ഷത്തിന്റെ അസാന്നിധ്യത്തിൽ, ഒടുവിൽ ശബ്ദവോട്ടോടെ ധനബിൽ നിയമസഭ പാസാക്കിയിരിക്കുകയാണ്. വീര്യം കുറഞ്ഞ മദ്യത്തിന്റെ നികുതി കുറച്ച നടപടി ഉൾപ്പെടെയുള്ള ബില്ലാണ് പ്രതിപക്ഷമില്ലാത്ത സഭ പാസാക്കിയത്. വരും ദിവസങ്ങളിലും ഈ മദ്യനയ വിവാദം ഭരണ-പ്രതിപക്ഷ പോരിലുടനീളം വലിയ കൊടുങ്കാറ്റ് ഉയർത്തുമെന്നുറപ്പ്.
(കേരള ടൈംസ് ന്യൂസ് ഡെസ്ക്.)
